Pages

9. huhtikuuta 2017

070417

Mie olin niin ilonen ko pääsin perjantaina koulusta. Mulla oli alkanu pitkä leeti (ei tartte mennä kouhluun ko vasta vasakuussa seuraavan kerran) ja ootin innola minun favoriitti juhlaa eli pääsiäistä. Ilonen stämninki kuiteski loppu ko Jens sms:asi ette se oli lukenu hirveitä uutisia Stockholmista.

 Ensimmäisenä mieli käypii läpi net ihmiset jokka vois olla tapahtumien centrumissä, sitten miehleen vyöryy muistoja siittä ko itte on kulkunu viimeksi samoila paikoila. Tunnuttaa kauhealta ette niilä tutuila kaduila ihmiset oon juosheet henkensä eestä karkhuun ja joutunheet näkheen ko jokku jäävät lastipiilin alle ja menevät lautti. Jokku sanovat ette tämä tapahtuma oli ootettavissa. Kyllä mullaki monta kertaa siinä samala kadula marsiessa oon käyny mielessä ette mitä jos jotaki tapahtuis. Molen havahtunnu siihen ette olen käyny lävitte mielessä skenaarioita, mihin päin mie laukkoisin jos tilane tulis kohale. Aina sitä oon kuiteski tullu siihen lopputuloksheen ette "tämähän oon turvallinen Ruotti, mitäpä täälä saattais sattua".
Oli kauhea nähä Expressen-aviisin julkasema valvontakameraviideo missä ihmiset laukkova vaatekauphaan karkhuun henkensä eestä. Justhiinsa samhaan kauphaan met laukoima pari vuotta sitten tyärten kanssa ko joku huumehöperö jahtasi meitä. Vaikka mekki olimma silloin kauhean pölästynheitä niin me emmä kuitenkhaan laukkohneet henkemme eestä niinko nämät ihmiset viimi perjantaina. Tuo tapahtuma oon järkyttäny koko Ruottia. Meiläki päin (isossa kylässä) on näkyny enemmän poliisipiilejä liikheelä. Mutta nyt elämän häätyy jatkua...

Met olemma valmistautunheet pääsiäisheen. Kävimä tänhään hakemassa pajunkissoja sisäle ja koristelimma net. Meilä oon yksi paikka tiiossa missä valkeat knoput ovat näin aikasten kevhäälä auenheet.

Seisahuin othaan kuvvaa parkkipaikale koulumatkala ko huomasin miten kaunis "orda" duottarin juurela oli. Näeks sie sen? (Puista muodostuva raja joka kulkee tunturin helmoissa)

Ei kommentteja:

Lähetä kommentti

Hei! Nyt julkaisen taas kommentteja blogiin, joten risut ja ruusut tänne siis.

Copyright @ SUNNÁ. Blog Design by KotrynaBassDesign